Türk Dövlətləri Təşkilatı yeni gücə çevrilir – VİDEO
Bu, TDT-na üzv ölkələrin müdafiə potensialının gücləndirilməsinə əsas verir. AZERFAX.az Real Tv-yə istinadın xəbər verir ki, Tacikistan, Qırğızıstan və Özbəkistan prezidentləri Emoməli Rəhmon, Sadır Japarov və Şavkat Mirziyoyev martın 31-də Xucənd şəhərində keçirilən birinci üçtərəfli sammitdə, üç ölkənin dövlət sərhədlərinin birləşməsi qovşağı haqqında Saziş, eləcə də əbədi dostluq haqqında Xucənd bəyannaməsini imzalayıblar. Hər üç ölkə mehriban qonşuluq münasibətlərinin möhkəmləndirilməsinin, infrastruktur və iqtisadi layihələrin birgə həyata keçirilməsinin, regionun turizm imkanlarının genişləndirilməsinin vacibliyini vurğulayıblar. Tərəflər sözügedən sənədə istinadən, regional sabitlik və əməkdaşlığa sadiq olduqlarını, xalqlar arasında əlaqələri gücləndirmək kimi ortaq məqsədlərini bir daha təsdiq ediblər. Özbəkistan və Qırğızıstan Türk Dövlətləri Təşkilatı üzvləridir. İndiki məqamda türk dövlətləri arasında siyasi-mədəni bağlar yeni mərhələdə inkişaf edir. Türk birliyinin möhkəmləndirilməsinə xidmət edən məqsədlər isə qarşıya hədəf olaraq qoyulub. Digər tərəfdən, bölgədə yaranan yeni reallıqlar da yeni regional əməkdaşlıq modelinin formalaşdırmasına zərurət yaradır ki, bu istiqamətdə də lazımi addımlar atılır.
TDT üzvləri mövcud ikitərəfli və çoxtərəfli əməkdaşlığın yüksək səviyyəsini nəzərə alaraq, təşkilatın müqavilə-hüquq bazasının genişləndirilməsi və möhkəmləndirilməsini dəstəkləyir. Nəzərə almalıyıq ki, üzv dövlətlərin yerləşdiyi coğrafiya həssas və dünya güclərinin diqqət mərkəzində olan regiondur, elə buna görə də burada təmsil olunan ölkələrin müdafiə potensialının gücləndirilməsinə ciddi əsas var. Unutmaq olmaz ki, ailəmiz Türk dünyasıdır. Və biz də Türk Dövlətləri Təşkilatı çərçivəsində səylərimizi davam etdirməliyik.
Bu bir həqiqətdir ki, xarici təzyiq və maneələrə baxmayaraq, Türk Dövlətləri Təşkilatı öz hədəflərinə doğru irəliləyir. Bu baxımdan, şübhə yoxdur ki, türk əsri çağırışı fonunda, işə düşən çevik qərar mexanizmləri Türk Dövlətləri Təşkilatını qlobal xarakterli məsələlərin həlli platformasına çevirəcək. Real Tv-nın hazırladığı video materialı təqdim edirik:
