Rusiyanın kosmosa nüvə silahı yerləşdirmək planı
Rusiya kosmosa nüvə silahı yerləşdirməyi planlaşdırır və bu silah partladılarsa, qlobal xaosa səbəb olaraq peyklərin 80%-ni sıradan çıxara bilər. Əslində, Rusiya “kosmik Pyorl-Harbor” təşkil edə bilər.
AZERFAX.AZ xəbər verir ki, bu barədə ABŞ Kosmik Komandanlığının rəhbəri general Stiven Uaytinq xəbərdarlığında bildirib.
Onun sözlərinə görə, ABŞ Kremlin planlarından çox narahatdır. Qeyd olunur ki, bu planlar Ukraynadakı müharibənin başlanmasından bəri müşahidə olunan kosmosda aqressiyanın gücləndirilməsinin bir hissəsidir.
“Rusiya yüksək inkişaf etmiş kosmik dövlətdir və kosmosa qarşı silahlara investisiya qoymağa davam edir. Onlar aşağı Yer orbitindəki bütün peyklər üçün təhlükə yarada biləcək nüvə qarşı-peyk silahını orbitə çıxarmağı planlaşdırırlar”, – deyə general bildirib.
Nəşr qeyd edir ki, Yer səthindən 300–1200 mil (təxminən 480–1930 km) hündürlükdə, yəni aşağı Yer orbitində baş verəcək nüvə partlayışı 10 minə qədər peyki və ya kosmosdakı peyklərin təxminən 80%-ni məhv edə və ya ciddi zədələyə bilər.
“Hərbi kəşfiyyat və yönləndirmə sistemlərinə ciddi zərbə ilə yanaşı, belə bir partlayış internet və mobil rabitə, həmçinin GPS xidmətləri daxil olmaqla, dünyanın mülki peyk kommunikasiyalarının böyük hissəsini sıradan çıxaracaq. Bu vəziyyət “kosmik Pyorl-Harbor” kimi qiymətləndirilir.
GPS siqnallarına müdaxilənin problemi ondadır ki, bu, Şərqi və Cənubi Avropada mülki aviasiyaya təsir edir. Biz sadəcə iş və ya istirahət üçün səyahət edən mülki insanların olduğu təyyarələri risk altına atdıqda, bu, son dərəcə ciddi problemdir. Biz bunun adi hala çevrilməsini istəmirik”, – deyə amerikalı general əlavə edib. (Axar.az)
