Azərbaycan daha bir tədbirə ev sahibliyi edəcək
Bakıda İslam İnkişaf Bankı (IsDB) Qrupunun 2026-cı il İllik Toplantılarına ev sahibliyi etmək üçün hazırlıqlar davam edərkən, Azərbaycanın iqtisadiyyat naziri və IsDB Rəhbərlər Şurasının sədri Mikayıl Cabbarov IsDB Qrupunun prezidenti Məhəmməd Əl-Casirin müşayiəti ilə tədbir ərəfəsində son hazırlıqları nəzərdən keçirmək üçün Bakı Konqres Mərkəzinə səfər edib.
Bu barədə AZERFAX.AZ-a İqtisadiyyat Nazirliyindən məlumat verilib.
“Səfər zamanı onlar təşkilat komitəsi ilə görüşüb və IsDB-nin 57 üzv ölkəsindən gələcək nümayəndələri qarşılamaq üçün hazırlıq vəziyyətini qiymətləndiriblər.
16-19 iyun 2026-cı il tarixlərində “Dayanıqlı Rifah üçün Regional İnteqrasiya” mövzusunda keçiriləcək İllik Toplantılar ümumi inkişaf prioritetlərini müzakirə etmək və üzv ölkələrin üzləşdiyi əsas sosial-iqtisadi çağırışlara praktiki həllər irəli sürmək məqsədilə maliyyə, iqtisadiyyat, beynəlxalq inkişaf və planlaşdırma nazirlərini, eləcə də inkişaf tərəfdaşlarını və özəl sektor liderlərini bir araya gətirəcək.
Proqrama Rəhbərlər Şuralarının iclasları, IsDB Qrupunun Sədri ilə aparıcı səmimi söhbət (fireside chat) formatında görüş, Rəhbərlərin Dialoqu, IsDB Qrupunun Özəl Sektor Forumu, Çoxtərəfli İnkişaf Banklarının Biznes İmkanları Forumu, Ərəb Koordinasiya Qrupunun Özəl Sektor Sessiyası, həmçinin bir sıra yüksək səviyyəli dəyirmi masalar, şəbəkələşmə imkanları, sərgilər və bilik mübadiləsi tədbirləri daxil olacaq. Müzakirələr İslam maliyyəsi, ticarət və əlaqəlilik, gənclərin məşğulluğu, iqlimə dayanıqlılıq, rəqəmsal transformasiya, süni intellekt, Sukuk(faizsiz investisiya gəliri), innovasiya, səhiyyə təhlükəsizliyi və sosial müdafiə sistemləri daxil olmaqla əsas inkişaf prioritetlərini əhatə edəcək:
“Bakı Konqres Mərkəzinə səfər IsDB Qrupu ilə İllik Toplantılara ikinci dəfə ev sahibliyi edən Azərbaycan arasındakı güclü tərəfdaşlığı vurğulayır. Bu, həmçinin onların IsDB-yə üzv ölkələr daxilində əməkdaşlığı, əlaqəliliyi və dayanıqlı inkişafı irəli aparan uğurlu bir tədbir təşkil etmək üçün ortaq sadiqliyini əks etdirir”.
Əlavə məlumat və proqram yenilikləri üçün, zəhmət olmasa, 2026-cı il IsDB Qrupunun İllik Toplantılarının rəsmi saytına daxil olun: IsDB Group Annual Meetings.
