UEFA bu iki ölkəyə texniki məğlubiyyət verdi

Avropa Futbol Assosiasiyaları Birliyi (UEFA) Estoniya və Litvanın 17 yaşadək qızlardan ibarət komandalarına Avropa Çempionatının seçmə mərhələsində belaruslu həmyaşıdlarına qarşı oyun keçirməkdən imtina etdiklərinə görə sanksiyalar tətbiq edib və komandaları cərimələyib.

AZERFAX.AZ xəbər verir ki, bu barədə Belarus Futbol Federasiyası məlumat yayıb:

“Estoniya Futbol Federasiyası və Litva Futbol Federasiyasının Belarus milli komandasına qarşı 17 yaşadək qadınlar arasında Avropa çempionatının seçmə mərhələ oyunlarında iştirak etməkdən imtina etməsi səbəbindən UEFA-nın Nəzarət, Etika və İntizam Orqanı Estoniya və Litva milli komandalarına 0:3 hesablı texniki məğlubiyyət verib.

Belarus U-17 komandası ilə Malta həmyaşıdları arasında qalan matçın dəqiq təfərrüatları daha sonra açıqlanacaq”.