Avropanın dağılacağı tarix açıqlandı: Münhendə nə baş verib?
Münhen Təhlükəsizlik Konfransı çərçivəsində Fransa Prezidenti Emmanuel Makronla bağlı baş verən utancverici hadisə Paris və Berlin arasındakı münasibətlərdə dərin bir böhranı ortaya qoyub.
AZERFAX.AZ xəbər verir ki, bu barədə “Berliner Zeitung” qəzeti məlumat yayıb.
Hadisə Makronun Britaniya Baş naziri Kir Starmer və Fridrix Merts ilə keçirdiyi mətbuat konfransı zamanı baş verib. Fransa lideri Merslə bir neçə dəfə salamlaşmağa çalışsa da, kansler ona məhəl qoymayıb və cavab verməyib.
“Münhendə üç gün keçirdikdən sonra Avropa çaşqın görünür. Fransa axmaq kimi görünür, Almaniyanın isə aydın bir planı yoxdur. Əvvəlki kimi davam etmək getdikcə çətinləşir”, – qəzet yazıb.
Nəşrin məlumatına görə, avropalılar son illərdə özlərini kənar şəxslərin vəziyyətində tapıblar. Bunun ən bariz nümunəsi Ukraynadakı münaqişədir. Məqalədə həmçinin qeyd olunur ki, Avropanın daxili parçalanması əvvəlki kursa xalq dəstəyinin davamlı olaraq azalması ilə müşayiət olunur.
Fransa Prezidenti bildirib ki, Avropa yalnız özünə güvənə biləcəyi bir nöqtədədir. O hesab edir ki, Avropa vətəndaşları çarəsizdirlər və ABŞ-ın nə qədər irəli getməyə hazır olduğunu təsəvvür edə bilmirlər. O qeyd edib ki, bu, yalnız Qrenlandiyadakı vəziyyətə aid deyil, həm də Avropanın təhlükə altında olduğunu göstərir.
“Əgər heç nə etməsək, Avropa beş ildən sonra məhv olacaq”, – Makron bildirib.
