DSMF-nin gəlirləri 5 milyard manatı, xərcləri isə 4.8 milyard manatı keçdi

Yanvar-iyul aylarında DSMF-nin xərcləri 431 milyon manat artaraq 4 milyard 811 milyon manat olub.

Bu barədə AZERFAX.AZ-a Dövlət Sosial Müdafiə Fondundan məlumat verilib.

Bildirilib ki, fondun gəlirləri bu ilin yanvar-iyul aylarında proqnozla müqayisədə 5 faiz və ya 239 milyon manat çox olmaqla 5 milyard 56 milyon manat təşkil edib.

Fondun gəlirləri tərkibində məcburi dövlət sosial sığorta daxilolmaları proqnoza nisbətən 6 faiz və ya 240 milyon manat artaraq 4 milyard 48 milyon manat olub.

Bu ilin 7 ayında DSMF-nin xərcləri isə 4 milyard 811 milyon manat təşkil edib ki, bu da ötən ilin müvafiq dövrünə nisbətən 10 faiz və ya 431 milyon manat çoxdur.