Klub prezidenti evində güllələndi
Bolqarıstanda “Botev Plovdiv” futbol klubunun prezidenti İlian Filipov qətlə yetirilib.
AZERFAX.AZ xəbər verir ki, bu barədə Bolqarıstan Daxili İşlər Nazirliyinə istinadən BNR radiosu məlumat yayıb.
Hücum 30 sentyabrda, saat 01:00 radələrində iş adamının şəxsi mülkündə baş verib. İlkin məhkəmə-tibbi ekspertizasının rəylərinə görə, 53 yaşlı məmur başından aldığı güllə yarasından hadisə yerində ölüb.
Qətl hadisəsi Filipovun klubun ev stadionunda Millətlər Liqasının ikinci turunda Bolqarıstan millisinin Estoniya ilə oyununa (0:0) qatılmasından bir neçə saat sonra baş verib.
Plovdiv hüquq-mühafizə orqanları Milli Polis Baş İdarəsi ilə birlikdə axtarış planı elan edib. Şəhərin bütün giriş və çıxışları nəzarət məntəqələri ilə bağlanıb və polis şübhəli nəqliyyat vasitələrini hərtərəfli yoxlayır.
Plovdiv prokuroru Vanya Xristeva brifinqdə bildirib ki, istintaq cinayətin bütün mümkün nəzəriyyələrini və motivlərini nəzərdən keçirir.
Qeyd etmək lazımdır ki, Filipov “Botev”in səhmlərinin əksəriyyətini 2025-ci ilin iyun ayında satın almışdı. O, klubun əvvəlki rəhbərlikdən qalan təxminən 3,5 milyon avroluq borclarını tam ödəmişdi.
İş adamı həmçinin stadionun yenidən qurulmasının başa çatdırılmasına kömək edib. O, Bolqarıstanın ən böyük nəqliyyat şirkətlərindən biri olan və Avropanın ən yaxşı 10 logistika şirkətindən biri olan PIMK-yə sahib idi.
Müəllif: Tural
