“Müqavimət oxu ABŞ-a unudulmaz dərslər verib”

“Qarşılıqlı anlaşma memorandumunun pozulması ABŞ prezidentinin imzasının dəyərsiz və etibarsız olduğunu bir daha sübut edib”.

AZERFAX.AZ “Tasnim”ə istinadla xəbər verir ki, bunu İranın Ali Rəhbəri Müctəba Xamenei deyib.

“İran və Amerika Birləşmiş Ştatlarının prezidentləri arasında imzalanmış qarşılıqlı anlaşma memorandumu ilə əldə edilmiş razılaşmaların dəfələrlə pozulması hamıya bir daha sübut etdi ki, Amerika Birləşmiş Ştatları prezidentinin imzası nə qədər dəyərsiz və etibarsızdır, həmçinin hədə-qorxu və vəhşilik Amerika ideologiyası və fəaliyyətinin ayrılmaz hissəsidir.

Bu gün “Böyük Şeytan” öz əsl simasını yenidən göstərdi. Onun yeni cinayətləri və vədlərini pozması Amerikanın yalançı və məkrli təbiətinin daha bir sübutudur.

İndi ki, Amerika düşməni müharibə başlatmağa çalışır, o, nəzərə almalıdır ki, İran və müqavimət oxu artıq ona unudulmaz dərslər verib.

Vəhdətin qorunması, parçalanmanın və siyasi fikir ayrılıqlarının aradan qaldırılması ümumi bir borcdur və əlbəttə ki, burada vəzifəli şəxslərin də rolu böyükdür.

Rəqib İranın zəifliyinə dair heç bir əlamət görməməlidir. Əks təqdirdə, o, qaçılmaz olaraq məğlub olacaq”, – deyə Xamenei qeyd edib.

Hüseyn İbadlı