Qarpızın yaxşısını necə seçək?
Yay mövsümünün ən sevilən meyvələrindən olan qarpız həm susuzluğu aradan qaldırır, həm də orqanizmi vitaminlərlə təmin edir.
AZERFAX.AZ xəbər verir ki, bazarda və mağazalarda satılan qarpızların hamısı eyni keyfiyyətdə olmur. Mütəxəssislər şirin və yetişmiş qarpızı seçmək üçün bir neçə vacib məqama diqqət yetirməyi tövsiyə edirlər.
İlk növbədə qarpızın üzərindəki sarı ləkəyə baxmaq lazımdır. Bu ləkə nə qədər iri və krem rənginə yaxın olarsa, qarpızın tarlada kifayət qədər yetişdiyini göstərir. Ağ rəngli və ya çox kiçik ləkələr isə meyvənin tam yetişmədiyinə işarə edə bilər.
Qarpızın qabığı da mühüm göstəricidir. Parlaq deyil, bir qədər tutqun görünən qabıq adətən yetişmiş qarpızın əlaməti sayılır. Həmçinin üzərindəki zolaqların aydın və seçilən olması da keyfiyyət göstəricilərindən biridir.
Mütəxəssislər qarpızı əllə vuraraq çıxan səsə də diqqət etməyi məsləhət görürlər. Dərin və boşluq hissi yaradan səs qarpızın yetişdiyini göstərir. Boğuq səs isə onun hələ tam yetişmədiyindən xəbər verə bilər.
Digər vacib məqam qarpızın çəkisidir. Eyni ölçüdə olan qarpızlar arasında daha ağır olanı seçmək tövsiyə edilir. Bu, meyvənin daha sulu və yetişmiş olduğuna işarə edir.
Qarpızın saplaq hissəsi də məlumat verir. Qurumuş və qəhvəyi rəngə çalan saplaq qarpızın yetişmiş olduğunu göstərir. Yaşıl və təzə görünən saplaq isə onun vaxtından əvvəl yığıldığını göstərə bilər.
Mütəxəssislər həmçinin kəsilmiş və açıq havada uzun müddət saxlanılan qarpızların alınmasını məsləhət görmürlər. Belə məhsullar bakteriyaların çoxalması üçün əlverişli mühit yarada bilər.
You must enable Javascript on your browser for the site to work optimally and display sections completely.
