Region

ADAU-da ev heyvanları üçün ödənişsiz qısırlaşdırma aksiyası keçirilir

Azərbaycan Dövlət Aqrar Universitetinin Baytarlıq təbabəti fakültəsinin Baytarlıq klinikasında ev heyvanları üçün ödənişsiz qısırlaşdırma aksiyası keçirilir. AZERFAX.az-ın yerli bürosunun məlumatına görə aksiya peşəkar baytar cərrahlar və ixtisaslı mütəxəssislər tərəfindən yüksək tibbi standartlara uyğun şəkildə icra edilir.

Universitetin Baytarlıq təbabəti fakültəsinin dekanı Şəlalə Zeynalova əməliyyatların Baytarlıq təbabəti fakültəsinin dosenti, çoxillik klinik təcrübəyə malik baytar cərrah Telman İsgəndərov və beynəlxalq təcrübəli mütəxəssis Prof. Dr. Kürşat Özer tərəfindən həyata keçirildiyini deyib:

“Aksiya çərçivəsində ADAU-ya dəvət olunan beynəlxalq təcrübəli mütəxəssis Prof. Dr. Kürşat Özer həm qısırlaşdırma sahəsində müasir yanaşmaları, əməliyyat təcrübələrini professor-müəllim heyəti və tələbələrlə bölüşəcək, həm də ev heyvanlarına ödənişsiz xidmət göstərəcək. Mütəxəssislərin iştirakı aksiyanın peşəkar şəkildə, müasir klinik tələblərə və təhlükəsizlik protokollarına uyğun icra olunmasını təmin edir.”

Sosial təşəbbüsün əsas məqsədi küçə heyvanlarının nəzarətsiz çoxalmasının qarşısının alınması, heyvanların sağlamlıq və rifahının yaxşılaşdırılması, zoonoz xəstəliklərin yayılma riskinin azaldılması, eləcə də məsuliyyətli heyvan sahibliyinin təşviq edilməsi olub.

Kürşat Özer Aqrar Universitetin Baytarlıq təbabəti fakültəsi ilə əməkdaşlığın 15 ildən çox müddətdə davam etdiyini diqqətə çatdıraraq bu cür təcrübə mübadilələrinin vacibliyini diqqətə çatdırıb.

“Aksiya ilə bağlı elan görmüşdüm. Mən də bu gün qısırlaşdırma üçün öz pişiyimi gətirmişəm. Heyvanımızın nəsil artımının sağlam və daha humanist yolla qarşısını almaq üçün bu aksiyaya qoşulduq. Bizə bu şəraiti yaratdığına görə Azərbaycan Dövlət Aqrar Universiteti rəhbərliyinə təşəkkür edirik,” – deyə şəhər sakini Aynurə Kərimzadə deyib.

Qeyd edək ki, bu gün start götürən aksiya sabah da ev heyvanları üçün tamamilə ödənişsiz həyata keçiriləcək.

Related Articles

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button