Görürəm və eşidirəm – Ançelottidən Neymarla bağlı tələblərə reaksiya
Braziliya millisinin baş məşqçisi Karlo Ançelotti futbol ictimaiyyətinin bəzi üzvlərinin “Santos”un hücumçusu Neymarın 2026-cı il dünya çempionatı üçün yekun heyətə daxil edilməsi tələbinə cavab verib.
AZERFAX.AZ xəbər verir ki, italyan mütəxəssis oyunçunu qarşıdan gələn yoldaşlıq oyunları üçün heyətə dəvət etməyib.
“Mən hər şeyi görürəm və eşidirəm. Amma mənim işim qərar verməkdir. Hər kəsin öz fikrini bildirməsi tamamilə normaldır, çünki futbolda universal həqiqət yoxdur. Hər kəs öz fikrini deyə bilər, çünki futbol dəqiq elm deyil. Hər kəsin öz fikri var və mən hər kəsin fikrinə hörmət etməliyəm.
Xüsusilə də burada olmayan oyunçulara hörmət etdiyim üçün heç bir işarə vermək istəmirəm (gülür). Bu qərarı may ayında verəcəyəm, amma ümumilikdə üç qapıçı heyəti artıq müəyyən edilib.
Müdafiə heyəti az-çox müəyyənləşib. Bu təlim-məşq toplanışı üçün üç yeni oyunçumuz var: Leo Pereyra, Bremer və Roger İbanes. Onların fiziki hazırlığını deyil, komandaya necə uyğunlaşdıqlarını qiymətləndirmək istəyirik. Onların hamısında Dünya Kubokuna getmək üçün lazım olan hər şey var. Onlardan birinin sağ cinah müdafiəçisi kimi oynaya biləcəyini nəzərə almaq lazımdır”, – ESPN Ançelottinin sözlərini sitat gətirib.
