Şəhəri sərinlətmək üçün süni duman yaratdılar
Çinin Yunçen şəhərində istilərə qarşı mübarizə aparmaq məqsədilə binaların damlarına havaya incə su dumanı püskürdən yeni soyutma sistemi quraşdırılıb.
AZERFAX.AZ xəbər verir ki, sistem sıx məskunlaşmış ərazilərdə həddindən artıq istiliyi azaltmaq və şəhərin yay aylarında daha sərin qalmasına kömək etmək üçün hazırlanıb. Məlumata görə, soyutma sistemi yaşayış binalarının damlarına yerləşdirilir. Yüksək təzyiqlə püskürdülən su hava ilə təmas edən kimi çox xırda damcılara çevrilərək sürətlə buxarlanır. Buxarlanma zamanı su ətrafdakı havanın istiliyini özünə çəkir. Bu proses nəticəsində binaların həyətlərində, bloklar arasında və fasadların yaxınlığında temperatur təxminən 5-8 dərəcə azalır.
Bu sistem adi kondisionerlərdən fərqli olaraq binaların daxilini deyil, onların ətrafındakı açıq havanı və xarici səthləri sərinləşdirməyə xidmət edir. Texnologiyanın işləmə prinsipi insan orqanizminin tərləmə yolu ilə soyumasına bənzəyir. Lakin sistem ən yüksək səmərəliliyi quru iqlim şəraitində göstərir.
Mütəxəssislər bildirirlər ki, rütubətin yüksək olduğu bölgələrdə su daha gec buxarlandığı üçün soyutma effekti zəifləyir. Bundan başqa, sistemin şəhər miqyasında tətbiqi zamanı su sərfiyyatı əsas problemlərdən biri hesab olunur.
You must enable Javascript on your browser for the site to work optimally and display sections completely.
