Amazon sifarişləri dronlarla 30 dəqiqəyə çatdıracaq

Amazon 2026-cı ilin sonunadək ABŞ-da dronlarla çatdırılma xidməti Prime Air-ın əhatə dairəsini təxminən 500 şəhər və qəsəbəyə genişləndirməyi planlaşdırır.

AZERFAX.AZ xəbər verir ki, bu, xidmətin hazırkı coğrafiyasının təxminən altı dəfə artırılması deməkdir.

Hazırda Prime Air ABŞ-ın 11 məntəqəsində fəaliyyət göstərir. Yeni mərhələdə Çikaqo, Atlanta, Klivlend, Sirakuza və Boise kimi şəhərlərin də xidmətə qoşulması nəzərdə tutulur.

Amazon bildirir ki, dronlarla ərzaq, elektronika, dərman və məişət məhsulları çatdırılır. Sifarişlər ən sürətli halda 30 dəqiqəyə müştəriyə çatdırıla bilər. Şirkətin məlumatına görə, bu il artıq dronlarla yüz minlərlə bağlama çatdırılıb.

Bununla yanaşı, xidmətin genişləndirilməsi tənzimləyici prosedurlar, təhlükəsizlik və məxfiliklə bağlı narahatlıqlar, hava şəraiti və dronların yaratdığı səs-küy kimi problemlərlə müşayiət olunur. Amazon həmçinin dronla çatdırılmanın ənənəvi kuryer xidmətləri ilə müqayisədə iqtisadi səmərəliliyini artırmağa çalışır.