Makron yeni ballistik raketin buraxılışını şəxsən izlədi
Fransa Prezidenti Emmanuel Makron freqatın göyərtəsindən “M51.3” nüvə raketinin buraxılışını izləyib.
AZERFAX.AZ xəbər verir ki, bu barədə “Le Parisien” qəzeti Yelisey sarayına istinadla məlumat yayıb.
“Emmanuel Makron Finister sahilləri yaxınlığındakı strateji raketdaşıyan atom sualtı qayığından buraxılmış qitələrarası ballistik raketin ilk sınaq buraxılışında iştirak edib”, – məlumatda deyilir.
Nüvə başlığı daşımaq qabiliyyətinə malik “M51.3” ballistik raketinin sınaqları oktyabrın 6-da keçirilib. Fransa Müdafiə Nazirliyindən bildiriblər ki, döyüş başlığı olmayan raket Bretan sahilləri yaxınlığındakı “Le Vigilant” sualtı qayığından buraxılıb və sahil xəttindən yüzlərlə kilometr aralıda Şimali Atlantikaya düşüb.
Avropa dövlətinin lideri daha sonra qeyd edib ki, çox az ölkə bu cür ustalığa malikdir. Makronun sözlərinə görə, azad olmaq üçün “qorxu yaratmaq lazımdır, qorxu yaratmaq üçün isə güclü olmaq lazımdır”.
Fransa təxminən 290–300 nüvə döyüş başlığına malikdir və nüvə arsenalının həcminə görə dünyada üçüncü yeri tutur. Əsası “Le Triomphant” tipli dörd strateji raketdaşıyan atom sualtı qayığında yerləşdirilmiş təqribən 240 döyüş başlığı təşkil edir.
Hüseyn İbadlı
