“Mançester Siti” üçün ən pis ssenari
“Mançester Siti” Premyer Liqanın maliyyə pozuntusu ittihamlarına görə son dərəcə ciddi nəticələrlə üzləşə bilər.
AZERFAX.AZ xəbər verir ki, bu barədə jurnalist Ben Ceykobs özünün “YouTube” kanalında bildirib.
“Əgər “Mançester Siti” Premyer Liqadan kənarlaşdırılarsa, EFL hökmü yenidən nəzərdən keçirməyi və həmrəylik nümayiş etdirmək üçün “Mançester Siti”ni də yarışlardan kənarda saxlamağa çalışaraq Premyer Liqanın mövqeyini dəstəkləməyi planlaşdırır.
Ən pis ssenaridə “Mançester Siti”nin futboldan tamamilə kənarlaşdırılması riski var. Amma bu, yalnız bir hüquqi ehtimaldır, ona görə də dəqiq cəza barədə fərziyyə irəli sürməyə dəyməz”, – deyə Ceykobs bildirib.
Qeyd etmək lazımdır ki, EFL İngiltərənin peşəkar divizionları olan Çempionşip, Liqa 1 və Liqa 2-ni birləşdirir.
“Mançester Siti” 2009-2018-ci illər arasında Premyer Liqanın maliyyə qaydalarını pozmaqda ittiham olunur. Liqa kluba qarşı 115 ittiham irəli sürüb. Bunlar maliyyə məlumatlarının verilməsi, oyunçulara və məşqçilərə ödənişlər, UEFA-nın Maliyyə Ədalətli Oyunu qaydalarına və gəlirlilik və davamlılıq tələblərinə riayət etməklə bağlıdır. İşə müstəqil komissiya baxır.
