“Mançester Siti” və “Çelsi”dən rekord transfer gözləntisi
Futbolda transfer qiymətlərinin sürətlə artması qapıçılar üçün də rekord məbləğlərin gündəmə gəlməsinə səbəb olub. İngiltərə millisinin sabiq qapıçısı Şaka Hislop yaxın illərdə bir qapıçının transferinə görə 100 milyon funt sterlinq ödəniləcəyini düşünür.
AZERFAX.AZ xəbər verir ki, Hislop belə bir rekordun gerçəkləşməsi üçün ən real namizədlər kimi “Mançester Siti” və “Çelsi”ni göstərib. Onun fikrincə, hər iki klub yüksək transfer xərcləri ilə seçilir və uyğun futbolçu ortaya çıxacağı təqdirdə bu məbləği ödəyə bilərlər.
Hazırda qapıçılar arasında transfer rekordu “Çelsi”yə məxsusdur. London klubu 2018-ci ildə Kepa Arrizabalaga üçün 71,6 milyon funt sterlinq ödəyib. “Liverpul” Alisson Bekkeri 67 milyon, “Mançester Yunayted” Andre Onananı 47,2 milyon, “Mançester Siti” isə Edersonu 34,7 milyon funt sterlinqə transfer edib. 2001-ci ildə Canluici Buffonun “Yuventus”a keçidi isə 32,6 milyon funt sterlinqə başa gəlib.
Hislop hesab edir ki, əvvəlcə müdafiəçilərin, daha sonra isə qapıçıların 100 milyon funt sterlinq həddini keçməsi məntiqli inkişafdır. O, bir neçə il əvvəl 125-150 milyon funtluq yarımmüdafiəçi transferlərinin də ağlasığmaz göründüyünü xatırladıb.
Sabiq qapıçıya görə, əgər kifayət qədər gənc və yüksək səviyyəli istedad ortaya çıxarsa, böyük klublardan biri onun üçün 100 milyon funt ödəyə bilər. Hislop David De Xea və Tibo Kurtua kimi qapıçıların gənc yaşda böyük klublarda əsas heyətə düşməsini buna nümunə göstərib.
Bununla yanaşı, “Çelsi”nin heyətində Belçikanın U-21 millisinin qapıçısı Mayk Penders də gələcək üçün namizəd hesab olunur. Onun inkişafı gözlənilən səviyyədə davam edərsə, London klubunun yeni qapıçıya rekord məbləğ ödəməsinə ehtiyac qalmaya bilər.
“Mançester Siti”nin gələcək transfer siyasətinə isə klubun üzləşdiyi maliyyə qaydaları ilə bağlı prosesin nəticəsi təsir göstərə bilər. Klubun 114 maliyyə qaydasını pozmaqda ittiham edilməsi ilə bağlı iş üzrə yekun vəziyyət hələ məlum deyil.
