Saqqızı udduqda nə baş verir?

Saqqızı təsadüfən udmaq demək olar ki, hər kəsin, xüsusilə də uşaqların başına gələ bilər, lakin saqqızın mədədə illərlə qalması ilə bağlı yayılmış mif həqiqətə uyğun deyil.

AZERFAX.AZ xəbər verir ki, bu barədə Gazeta.ru ilə söhbətində “SM-Klinika”nın cərrahı Sergey Trınov məlumat verib.

“Adi halda udulmuş saqqız tam həzm olunmur, lakin orqanizmdə illərlə də qalmır. Saqqızın əsasını həzm fermentlərinin demək olar ki, parçalamadığı saqqız kütləsi təşkil edir. Lakin udulduqdan sonra o, digər qida ilə birlikdə mədə-bağırsaq traktından keçir və nəticədə təbii yolla xaric olunur”, – deyə Trınov izah edib.

Onun sözlərinə görə, əgər insan birdəfəlik bir saqqız udubsa, bir qayda olaraq, heç bir nəticəsi olmur. Qəsdən qusmaq və ya onu orqanizmdən hansısa üsulla “çıxarmağa” çalışmaq lazım deyil. Adi qidalanma rejiminə davam etmək və su içmək kifayətdir.

Cərrahın sözlərinə görə, insan qısa müddət ərzində çox miqdarda saqqız udarsa, vəziyyət bir qədər fərqli görünə bilər.

“Nadir hallarda bu, bağırsaqda sıx kütlənin əmələ gəlməsinə və onun keçiriciliyinin pozulmasına səbəb ola bilər. Belə bir vəziyyətə azyaşlı uşaqlarda xüsusilə diqqətlə yanaşmaq lazımdır”, – deyə Trınov xəbərdarlıq edib.

Həkimin sözlərinə görə, çox miqdarda saqqız udulduqdan sonra güclü və ya artan qarın ağrısı, təkrarlanan qusma, güclü köp, nəcis və ya qazların olmaması və mümkün bağırsaq keçməzliyinin digər əlamətləri meydana çıxarsa, tibbi yardım üçün müraciət etmək lazımdır.

“Beləliklə, təsadüfən bir saqqız udmaq adətən təhlükəli deyil. Orqanizm onu tam həzm etməyə qadir deyil, lakin o, həzm traktından keçir və təbii şəkildə xaric olunur. Əsas risk təkrar udulması ilə deyil, qısa müddət ərzində çox miqdarda saqqız istehlak edilməsi ilə bağlıdır”, – deyə Trınov yekunlaşdırıb.

Hüseyn İbadlı