Xəyanəti bağışlamağa hazır olan insanların SAYI HESABLANDI
Xəyanət ənənəvi olaraq cütlüklər üçün ən dağıdıcı hadisələrdən biri hesab olunur. Mədəniyyətdə bu hadisə çox vaxt sevginin bitməsi kimi qələmə verilir.
AZERFAX.AZ “Journal of Sex & Marital Therapy” jurnalında dərc olunan Amerika psixoloqlarının genişmiqyaslı araşdırmasına istinadla xəbər verir ki, bu stereotip həqiqəti əks etdirmir və bir çox cütlüklər böhrandan sonra münasibətlərini qoruya bilir.
Alimlər 3429 nəfərin (1151 xəyanət edən və 2278 xəyanətə uğrayan şəxs) təcrübəsini təhlil ediblər. Respondentlərin əksəriyyətini (74%) 40-49 yaşlı, uşaqları olan evli qadınlar təşkil edib.
Araşdırma nəticəsində məlum olub ki, birlikdə qalan cütlüklərin payı gözlənilməz dərəcədə yüksəkdir: xəyanət edənlərin 76%-i kənar münasibəti bitirərək ailədə qalıb. Eyni zamanda, aldadılan şəxslərin 79%-i xəyanəti öyrəndikdən sonra nikahı qoruduqlarını təsdiqləyib.
Xəyanət edən tərəf üçün birliyin xilas olmasında əsas amil daimi partnyora olan sevginin qalması olub. Əgər xəyanət edən şəxs partnyorunu sevməyə davam edibsə və üçüncü şəxsə qarşı dərin hisslər keçirməyibsə, barışıq səviyyəsi 89%-ə çatıb. Bundan əlavə, xəyanət edənlərin 73%-i proses zamanı özlərini günahkar hiss etdiklərini etiraf ediblər. Bu, xəyanətlərin çoxunun “daha yaxşı variant” axtarışı deyil, daxili münaqişənin nəticəsi olduğunu göstərir.
Aldadılan partnyorlar üçün birliyi qorumağın ən vacib amili münasibətlərin statusu olub. Evli və ya nişanlı olan insanlar barışığa daha çox meylli olublar. Ümumi uşaqlar, əmlak və ortaq tarix ailə uğrunda mübarizə aparmaq üçün güclü motivasiya yaradır.
Bununla yanaşı, günahkar tərəfin göstərdiyi səylər həlledici rol oynayır: daimi emosional dəstək, aldadılanın ağrısını qəbul etmək, xəyanətlə bağlı suallara dürüst cavab vermək və üçüncü şəxslə bütün əlaqələri kəsmək vacib şərtlərdir. Günahkar tərəf dialoqa hazır olduqda və kənar əlaqəni tamamilə kəsdikdə, evli və ya nişanlı cütlüklərin 93%-i böhranı uğurla aşır.
Paradoksal olaraq, cütlüklər sarsıntıdan sonrakı həyatlarını müsbət qiymətləndiriblər. Xəyanət edənlərin təxminən 70%-i və aldadılanların 36%-i xəyanətdən sonra münasibətlərinin əvvəlkindən daha yaxşı olduğunu bildirib. Alimlər qeyd edirlər ki, xəyanət “dərman” sayılmasa da, bu, cütlüklərin köhnə problemləri həll etməsinə və münasibətləri yenidən qurmasına səbəb ola bilər.
Hüseyn İbadlı
