Nepalda möcüzə – 9 gün tuneldə qalan işçi xilas edildi

Nepalda baş verən sel və torpaq sürüşməsindən sonra hidroelektrik stansiyasının tunelində 9 gün ərzində köməksiz qalan işçi xilas edilərək ailəsinə qovuşub.

AZERFAX.AZ xəbər verir ki, 30 yaşlı Sanjay Sah avqustun 26-da baş verən güclü sel fəlakətindən sonra “Upper Trishuli 3A” hidroelektrik stansiyasının tunelində ilişib qalıb.

Xilasetmə qrupları günlərlə davam edən işlərdən sonra hadisənin 10-cu gününün səhərində Sah və digər işçi Kabir Maharjana çata bilib. Hər iki işçi tuneldən çıxarılaraq təhlükəsiz əraziyə aparılıb.

Tuneldə qida ehtiyatı olmayan Sah həyatda qala bilmək üçün sel sularından və dağ qayalarından sızan sudan istifadə edib. Qaranlıq və dağıntılarla dolu tuneldə əlavə təhlükə ilə üzləşməmək üçün isə əsasən olduğu yerdə qalıb.

Sanjay Sah Saptari rayonundakı evinə qayıtdıqdan sonra ailəsi tərəfindən hindu dini ənənələrinə uyğun xüsusi mərasimlə qarşılanıb.

Hadisə Sahın yaşadığı kənddə böyük sevincə səbəb olub.