Ukraynaya 6,1 milyard avroluq dəstək

Avropa İttifaqı Ukraynanın hava və raketdən müdafiə sistemləri, raketlər, sursat və radarlar alması üçün 6,1 milyard avroluq maliyyələşməni təsdiqləyib.

AZERFAX.AZ xəbər verir ki, Aİ Komissiyasının məlumatına görə, vəsait 2026-2027-ci illərdə Ukraynaya təqdim olunması nəzərdə tutulan 90 milyard avroluq dəstək krediti çərçivəsində ayrılacaq. Yeni maliyyə paketi daha əvvəl təsdiqlənmiş 16 milyard avroluq müdafiə tədarükünə əlavədir. Həmin məbləğin 8,35 milyard avroluq hissəsinin artıq Ukraynaya təqdim edildiyi bildirilib.

Aİ Komissiyasının prezidenti Ursula fon der Lyayen Avropanın Ukraynaya dəstəyinin qətiyyətli və konkret olduğunu vurğulayıb. O, Rusiyanın hücumlarını intensivləşdirdiyini və Ukraynanın hava və raketdən müdafiə vasitələrinə təcili ehtiyac duyduğunu qeyd edib.