Polat Alemdar illər sonra ortaya çıxdı
Türkiyənin məşhur “Kurtlar Vadisi” serialında canlandırdığı Polat Alemdar obrazı ilə milyonlarla tamaşaçının sevgisini qazanan aktyor Necati Şaşmaz uzun müddətdən sonra yenidən ictimaiyyət qarşısına çıxıb.
AZERFAX.AZ xəbər verir ki, ekran və kino layihələrindən uzun müddətdir uzaq qalan məşhur aktyor qatıldığı tədbirlərdən birində obyektivlərə tuş gəlib. Tədbirdə qonaqlarla xatirə şəkilləri çəkdirən, dostları ilə səmimi söhbət edən Şaşmazın sakit və təvazökar davranışı diqqət çəkib.
Aktyorun illər ərzində dəyişən görünüşü də sosial şəbəkələrdə geniş müzakirələrə səbəb olub. Xüsusilə saçlarının ağarması və əvvəlki illərlə müqayisədə fərqli imici izləyicilər tərəfindən maraqla qarşılanıb. Bir çox istifadəçi onun yenidən ekranlara qayıtmasını arzuladıqlarını bildirərək “Polat Alemdarı yenidən görmək istəyirik”, “İllər keçsə də, xarizması dəyişməyib” kimi şərhlər yazıblar.
Qeyd edək ki, Necati Şaşmaz son illərdə mediadan uzaq həyat tərzi sürür. Aktyor müxtəlif vaxtlarda “Kurtlar Vadisi” layihəsinin yenidən çəkilə biləcəyi ilə bağlı açıqlamalar versə də, serialın yeni mövsümü indiyədək reallaşmayıb. Buna baxmayaraq, onun hər yeni görüntüsü pərəstişkarları arasında böyük maraq doğurmağa davam edir.
