Dünya Kubokunda ŞOK TƏHDİDLƏR – Messini partlatmaq, Ronaldonu qaçırmaq istəyiblər
FTB tərəfindən əlaqələndirilən Beynəlxalq Polis Əməkdaşlıq Mərkəzinin (IPCC) daxili sənədlərinə görə, ABŞ-da keçirilən futbol üzrə dünya çempionatı futbolçulara, hakimlərə və milli komandalara qarşı görünməmiş həcmdə təhdid və təqib halları ilə yadda qalıb.
AZERFAX.AZ xəbər verir ki, bu barədə “Información” qəzeti məlumat yayıb.
“Información” tərəfindən sitat gətirilən hesabatlara əsasən, Lionel Messi çempionatdan əvvəl və çempionat zamanı ən çox təhdid edilən oyunçu olub. Ən ciddi hallar arasında Dallas hava limanına edilən bir zəng də var; həmin zəngdə naməlum şəxs onun və digər iki kişinin əldəqayırma bombalar və “AR-15” tüfəngi ilə stadiona doğru hərəkət etdiklərini bildirərək, argentinalı futbolçuya hücum etmək niyyətində olduğunu açıq şəkildə qeyd edib.
Atlantada keçirilən digər bir matçda isə “X” sosial şəbəkəsinin istifadəçisi stadiona daxil olmaq üzrə olduğunu və bədəninə bərkidilmiş dörd bomba ilə Messini partlatacağını yazıb. Təhdidlər səbəbindən ərazini yoxlamaq üçün partlayıcı maddələr üzrə mütəxəssislər, kinoloqlar və K-9 agentləri cəlb olunub.
“Información” qəzetinin eksklüziv materialında ətraflı bildirilir ki, Kriştianu Ronaldu obsessiv azarkeşlər tərəfindən ən çox təqib edilən futbolçu olub. Hyuston və Torontoda portuqaliyalı futbolçuya yaxınlaşmağa cəhd edən, hətta liftlərə və ya məhdud girişli zonalara soxulan şəxslər saxlanılıblar. Portuqaliya–Xorvatiya matçı zamanı onun formasını geyinmiş azarkeş ona çatmaq üçün meydançaya tullanıb.
Həmçinin Komandanın qaldığı mehmanxanada şübhəli şəxs görünərək Ronaldonun yeri haqqında təfərrüatlı məlumat tələb edib. FTB bu barədə FIFA-ya xəbərdarlıq edib və iki gün sonra həmin şəxs Hyustonda, elə həmin hoteldə həbs olunub. Onun portuqaliyalı ulduzu qaçırmaq istədiyi qeyd olunub. Analoji hadisə Torontoda da baş verib – başqa bir şəxs portuqaliyalı futbolçunun olduğu liftə daxil olmağa cəhd edib.
Qəzet həmçinin Paraqvayın qapıçısı ilə toqquşmadan sonra ksenofobik mesajlarla təhqir olunan Kilian Mbappeyə qarşı insidentləri də qeyd edir. Həmin ölkədə azarkeşlər onun təsviri olan kuklanı yandırıb və bu əməli sosial şəbəkələrdə yayıblar.
Matçlardakı səhvlərdən sonra digər futbolçular, o cümlədən Aleksander Sörlot, Xaminton Kampaz və ya Lamin Yamala qarşı penalti səhvi buraxan Lukas Din ölüm hədələri alıblar.
“Información” qəzetinin məlumatına görə, ən ağır hal Argentina–Misir matçını idarə etdikdən sonra şəxsi “WhatsApp” hesabında 6 mindən çox təhdid alan fransız hakim Fransua Letesiyenin başına gəlib. Onun Fransadakı ailəsi və evi polis tərəfindən qorunmalı olub. VAR köməkçisi Villi Delajod da təhdid edilib.
Hüseyn İbadlı
