Rusiyadan bu əraziləri tələb edir
Baş nazir Sanae Takaiti Parlamentin sessiyasının açılışında etdiyi əsas çıxışında bildirib ki, Yaponiya ərazi məsələsinin həlli və Rusiya ilə sülh müqaviləsi bağlamaq istiqamətindəki kursunu davam etdirəcək.
AZERFAX.AZ xəbər verir ki, o, həmçinin “Şimal əraziləri”ni Yaponiyanın ənənəvi əraziləri adlandırıb.
Takaiti bir daha Rusiyanın Ukraynadakı hərəkətlərini tənqid edib. O, Kuril adalarının cənub hissəsinin tarixən və beynəlxalq səviyyədə Yaponiya ərazisi olduğunu bildirib.
Moskva və Tokio 20-ci əsrin ortalarından bəri – İkinci Dünya Müharibəsindən sonra sülh müqaviləsi üzrə danışıqlar aparırlar. Əsas maneə cənubi Kuril adalarına dair hüquqlarla bağlı fikir ayrılıqlarıdır.
Müharibədən sonra bütün arxipelaq Sovet İttifaqına birləşdirildi. Yaponiya İturup, Kunaşir, Şikotan və bir qrup kiçik, yaşayış olmayan adaların mülkiyyəti ilə bağlı mübahisə edir.
Rusiya Xarici İşlər Nazirliyi dəfələrlə vurğulayıb ki, Rusiyanın bu ərazilər üzərində suverenliyi beynəlxalq hüquqla rəsmiləşdirilib və mübahisə mövzusu deyil.
Oktyabrın 1-də Rusiya Prezidenti Vladimir Putin “Valday” Müzakirə Klubunun plenar iclasında Rusiyanın Yaponiya ilə yaxşı və qonşuluq münasibətləri qurmağa çalışdığını bildirib. O, əlavə edib ki, hər iki ölkənin qarşılıqlı maraq doğuran sahələri var.
Putin qeyd edib ki, Rusiyanın Yaponiya ilə münasibətlərə yanaşması dəyişməyib, lakin Tokionun Moskvaya münasibəti dəyişib. O, Yaponiyanın Rusiyaya qarşı sanksiyalar tətbiq etdiyini qeyd edib.
Müəllif: Tural
